ਲੰਘੇ ਪਾਣੀ ਦਾ ਕਦੇ ਗਾਰਾ ਨਹੀਓ ਲਾਈਦਾ
ਛੇੜ ਕੇ ਸੁਕੂਨੀ ਮਿੱਟੀ ਖਿਲਾਰਾ ਨਹੀਓ ਪਾਈਦਾ
ਮੰਨਿਆ, ਪਾਣੀ ਹੀ ਫੁਲਾਉਂਦੇ ਨੇ ਖੇਤਾਂ ਵਿੱਚ ਸੰਨ੍ਹਾਂ ਨੂੰ
ਪਰ ਇਹਨਾਂ ਪਾਣੀਆਂ ਨਾਲ ਚੁਬਾਰਾ ਨਹੀਓ ਪਈਦਾ

ਪਾਣੀ ਤਾਂ ਮਿਲ ਹੀ ਜਾਣਾ ਏ ਦਿਨ ਚ ਯਾ ਰਾਤ ਚ
ਵੱਟਾਂ ਦੀ ਗਿੱਲੀ ਮਿੱਟੀ ਨੂੰ ਸਦਾ ਰੱਖੀਦਾ ਔਕਾਤ ਚ
ਜ਼ਿਦ ਵਿੱਚ ਕਹੀਆਂ ਨੂੰ ਬਾਹਲਾ ਨੀ ਘਸਾਈਦਾ
ਲੰਘੇ ਪਾਣੀਆਂ ਨਾਲ ਚੁਬਾਰਾ ਨਹੀਓ ਪਈਦਾ,

ਬੱਦਲਾਂ ਦਾ ਸ਼ੋਰ ਰਲ ਹਵਾਵਾਂ ਤੇਜ਼ ਵਹੀਆਂ ਸੀ
ਛਿੱਟਿਆਂ ਦੀ ਸੱਟ ਨਾਲ ਫ਼ਸਲਾਂ ਖੜੀਆਂ ਨਾ ਰਹੀਆਂ ਸੀ
ਬੀਤੀਆਂ ਰੁੱਤਾਂ ਨੂੰ ਬੱਧਣ ਮੁੜ ਨਹੀਂ ਬੁਲਾਈਦਾ
ਲੰਘੇ ਪਾਣੀਆਂ ਨਾਲ ਚੁਬਾਰਾ ਨਹੀਓ ਪਈਦਾ

ਫ਼ਸਲਾਂ ਦੀ ਰੁੱਤ ਦੀ ਉਡੀਕ ਭਾਂਵੇ ਕੌੜੀ ਏ
ਵੱਸਲਾ ਦੀ ਰੁੱਤ ਦੀ ਤਾਰੀਕ ਬਸ ਥੋੜੀ ਏ
ਪੁੰਗਰੇ ਸਿਟਿਆਂ ਨੂੰ ਨੀਝ ਨਾਲ ਵਾਹੀਦਾ
ਲੰਘੇ ਪਾਣੀਆਂ ਨਾਲ ਚੁਬਾਰਾ ਨਹੀਓ ਪਈਦਾ